Subscribe by Email

Vryval van edelmetale – “Dom” kopers betaal prys

Op 5 September het die goudprys ‘n nuwe hoogte bereik toe dit sy kop tot net bo die $1 900 per fyn ons opgetel het. Skaars 20 dae later is die goudprys skynbaar steeds in ‘n vryval, en het dit na $1 564 getuimel, dus amper $500 in minder as ‘n maand. Boonop was daar nie soveel goeie ekonomiese nuus dat dít die oorsaak kan wees dat beleggers na ander beleggingsopsies kyk nie.

Hoewel dit die laagste vlak in twee maande is, is die perspektief dat dit steeds hoër is as die afgelope ses maande se laaste vlak van $1 418,70.

As iemand egter meen die goudprys het hamerhoue weg, dan moet hy liefs die oë toeknyp vir wat die prys van platinum aanvang. Jare lank was die platinumprys as ‘n reël hoër as die goudprys, maar sedert goud die $1 900-merk uitgedaag het, is goud byna altyd hoër as platinum. Op die oomblik staan die platinumprys op ‘n “skamele” $1 486 per fyn ons. Platinum, wat meer nywerheidsaanwending het as goud, is ongelukkig ook ‘n goeie aanduider van hoe gesond die wêreldekonomie is, en geoordeel na hoe platinum nou vaar, boesem dit nie veel vertroue vir die voorsienbare toekoms in nie. .

Ook die silwerprys het erg geduik, nadat silwerbeleggers onlangs nog groot drome gedroom het. Terwyl die silwerprys lank net onder en bo $40 per fyn ons gewissel het, het dit skielik saam in die vryval beland en tot $26 getuimel. Beleggers wat op die hoogtepunt silwer aangeskaf het, het dus in minder as 20 dae heelwat meer as ‘n derde van hul beleggings soos mis voor die son sien verdamp.

Wat het die tuimeling veroorsaak?

Ontleder wys daarop dat, inflasie in ag genome, die goudprys nou op sy piek nog dertig persent laer was as op die 1980-hoogtepunt. Dit geld egter nie Suid-Afrika so seer nie, waar die rand se wisselkoers teen die dollar nie net omgeruil het nie, maar die rand erg in waarde getuimel het. Selfs minder dollars beteken dus meer rande.

Tog het analiste in Augustus gemaan dat die goudprys by ‘n piek is, en matig kan daal. Die omvang van die daling was egter nie matig nie. Een van die hoofredes is wat in die finansiële wêreld as dom belegging bekend staan. Te veel klein beleggers het opportunisties probeer (goue) munt slaan, en die goudprys kunsmatig opgejaag. Klein beleggers het die afgelope jaar verdriedubbel, terwyl die groot beleggers basies onveranderd gebly het.

Beleggersadviseurs het tydens die piek gemaan dat beleggers hul beleggings moet verskans (hedging) as hulle enigsins kon. Goudkoors verstaan egter nie rede nie.

Behalwe dat die goudprys waarskynlik kunsmatig hoog was, is die onderliggende faktore wat beleggers laat glo het die prys van goud en silwer kon nog aansienlik styg steeds teenwoordig. Wanneer winsneming en paniekverkope afgeplat het, en koel koppe weer die saak bestendig, kan die goudprys dus weer styg.

Die erge wisseling van die pryse sal waarskynlik mynreuse in Suid-Afrika twee keer laat dink om nuwe skagte te sink of skagte wat weens onlonendheid uit bedryf gestel is weer in bedryf te stel.

Die hoër pryse die afgelope 5 jaar (toe die goudprys $600 per fyn ons was) het nuwe, maar beperkte lewe in Montana se eens florerende goudmynbaktiwiteite geblaas. Gelukkig was van die ou masjinerie om die mynrots te vergruis en ander toerusting met bietjie lapwerk steeds bruikbaar. Omgewingswetgewing plaas egter ‘n sterk demper op die ontwikkeling of heraktivering van Amerikaanse myne, maar delwers wat met hul panne langs rivierlope op ‘n gelukkie hoop, is nou weer ‘n algemene gesig.