Subscribe by Email

Prof. Tim Noakes se dieet.

JOHANNESBURG. – Prof. Tim Noakes se omstrede “laekoolhidraat, hoë-vet-” (LKHV)-dieet is opnuut in die spervuur nadat ’n kardioloog gesê het dit is “misdadig”.

’n Ondersoek deur Volksblad het bevind dat al hoe meer medici hul stem voeg by dié van kenners wat Noakes se dieet verwerp en waarsku dat dit ernstige gevolge vir ’n mens se gesondheid kan inhou.

Veral Afrikaners, wat ’n hoë voorkoms het van “slegte” cholesterol, word gewaarsku teen Noakes se dieet.

Noakes, ’n bekende sportwetenskaplike by die Universiteit van Kaapstad, beweer dat sy hoëvet-dieet alle risikofaktore vir hartsiektes kan omkeer.

Gevolglik het verskeie pasiënte met hoë cholesterol hul medisyne (statien) verruil vir die LKHV-dieet – met skadelike nagevolge.

Sy kookboek The Real Meal Revolution het vroeër vanjaar verskyn en is ’n topverkoper.

Die kardioloog dr. Anthony Dalby het verlede week Noakes se advies aan hartpasiënte om hul cholesterol-medisyne vir sy dieet te verruil as “misdadig” bestempel.

Prof. Tessa van der Merwe, ’n internasionale kenner op die gebied van vetsug, sê daar is “baie gesondheidsgevare gekoppel aan die LKHV-dieet”.

Dit kan hartsiektes, diabetes en osteoporose vererger, en gal- en nierstene veroorsaak, sê Van der Merwe, ’n ereprofessor in endokrinologie aan die Universiteit van Pretoria en stigter van die Netcare- Bariatriese Sentrum by die Unitas-hospitaal.

“As jy familiale hipercholesterolemie (FH of oorerflike hoë cholesterol) het, bestaan ’n werklike gevaar dat jy ’n ongunstige cholesterol-profiel sal ontwikkel,” sê sy.

FH word deur ’n genetiese afwyking veroorsaak wat lei tot hoë (“slegte”) cholesterol. Dit is veral algemeen onder Afrikaners, waar ’n 1:70-voorkoms is teenoor ’n 1:500-voorkoms in die wyer gemeenskap.

Die doeltreffendheid van die Noakes-dieet word ook bevraagteken nadat ’n onlangse oorsigstudie deur die Universiteit Stellenbosch bevind het dat mense op ’n laekoolhidraat-dieet soortgelyke gewigsverlies bereik het as mense op ’n laevet-dieet.

Dalby sê een van sy pasiënte se totale bloed-cholesterolvlakke het meer as verdubbel (van 5,1 tot 12,9) nadat sy haar statien verruil het vir Noakes se dieet.

Maar toe die 39-jarige vrou teruggekeer het na ’n normale dieet en weer haar medisyne begin neem het, het haar cholesterol aansienlik afgeneem na 7,3.

Statien is besonder belangrik vir genetiese FH.

“Statien maak ’n geweldige verskil in die risiko vir hartsiektes in diegene met FH, aangesien hulle nie hul cholesterolvlakke deur leefstyl kan beheer nie,” sê prof. David Marais, hoof van lipidologie aan die Universiteit van Kaapstad.

“Navorsing toon dat mans met onbehandelde FH gemiddeld op die ouderdom van 43 sterf, en 85% van hulle sal nie die ouderdom van 60 haal nie.”

Noakes erken dat die LKHV-dieet cholesterolvlakke in ongeveer een uit elke drie mense opjaag, maar beskou dit nie as ’n gesondheidsrisiko nie. Hy betwis dit dat bloedcholesterolvlakke koronêre hartsiekte veroorsaak.

In plaas van cholesterol, blameer Noakes insulien-weerstandigheid (IW) vir hartsiektes. – Health-e News Service

tim noakes