Subscribe by Email

Nuuskommentaar: Smokkel met koppe oor Italiaanse ekonomie

‘n Nuusberig dat die president van die Europese Kommissie, Herman van Rompuy, gister ‘n spoedberaad in Brussel byeengeroep het om die groeiende Italiaanse skuldkrisis te bespreek, het dadelik die aandag getrek.
‘n Verklaring is gou uitgereik om dit te ontken, en uit die inligting wat beskikbaar gestel is, klink dit inderdaad asof die Griekse tragedie die hoofkwessie onder die ontleedmes was. Die Duitse kanselier, Angela Merkel, het ook ‘n duidelike standpunt gestel dat sy vertroue in die Italiaanse ekonomie het.
Op die oog af lyk dit asof die Europese leiers kliphard werk op die basis dat die ekonomie iets is wat hoofsaaklik sielkundig in mense se koppe aangaan, en dat gerusstellings nou die beste medisyne is. Hoe goed dit gewerk het, is ‘n ope vraag. Vrydag het die beurs van Milaan ‘n swart Vrydag beleef. Gister het verskeie Europese beurse ‘n blou Maandag beleef. Hieronder tel die markte van België, Frankryk (beide meer as 2 persent verliese) en Italië, wat met vier persent verliese ‘n baie donker blou Maandag beleef het. Dadelik het berigte verskyn wat ook vrae begin vra of Frankryk nie ook op pad is na die Griekse tragedie nie.
Waarnemers wys daarop dat die krisis in Griekeland en Portugal wel beduidend is, maar vulletjies is in vergeleke met sou Italië en Spanje vou. Italië staan as Europa se derde ekonomie bekend, en beskik oor die grootste obligasiemark. Die mark het ook gister onsagkens met Spanje te werk gegaan.
Naas die skuldomvang, het die obligasiemarkte juis ‘n bykomende kopkrapper vir Europa geword. Hoe groter die skuld, hoe hoër word die rentekoers van ‘n bepaalde land se obligasiemark. Die lande leen dikwels geld teen die obligasiemark om tekorte aan te vul, en hoe hoër die rentekoers, hoe harder moet die lande wat reeds in die knyp is, aan sy skuld afbetaal. In Suid-Afrikaanse terme is die huidige rentevlakke van die Milaanse obligasiemark van sowat 5,7 % laag, maar in die Europese konteks waar rentekoerse werklik baie laag is, is dit sorgwekkend. Spanje se obligasierente het die sielkundige vlak van ses persent bereik. Ekonome meen sou die Italiaanse obligasierente met nog twee persent styg, word die Vandale, by wyse van spreke, op die Italiaanse ekonomie losgelaat.
Of die regerings van Europa werklik houtpop gerus is oor Italië se ekonomie, en of hulle bloot die krisis wil afweer deur nie gerusstellend op te tree, of selfs net tyd probeer koop – vanoggend berig De Standaard dat die vuur wat die mark in Italië trek, beleggers ontstig het en dat hulle nou die lem van die mes teen die EU-ministers se kele hou.
Intussen kom die EU-ministers ook nog nie presies ooreen oor hoe om die Griekse obligasieprobleem die hoof te bied nie. Die plan wat uiteindelik aanvaar sal word, naamlik dat die “slegte valuta” van Griekeland deur ‘n Europese noodfonds opgekoop moet word, hou groot gevaar vir die Euro self in.
Intussen hou Europa ook een oog wawyd oop op die VSA, waar pres, Barack Obama nog vasbrand in sy planne om die Amerikaanse perk vir staatskuld tot bo die huidige perk van $14 triljoen verhoog te kry. Tot dusver wil die Republikeine nie kopgee nie.
Herman Toerien