Netcare doen humanitere hulp aan pasiënte van provinsiale hospitale

Die privaathospitaalgroep, Netcare, sê hulle het meer as 730 pasiënte behandel wat weens die staatsdiensstaking nie toegang tot gesondheidsorg by ‘n staatshospitaal kon kry nie.

Die bestuurshoof van Netcare, dr. Richard Friedland, sê die pasiënte wat behandel is was baie siek of uiters kwesbaar. Hy sê onder normale omstandighede sou die sorg, medikasie en gespesialiseerde diens sowat 15 miljoen rand gekos het.

Hy het beklemtoon dat Netcare nie betaling vir sy dienste eis nie, omdat die groep dit as humanitêre hulpverlening beskou. Friedland sê al die Netcare hospitale vaar goed, ondanks die buitengewone groot hoeveelheid pasiënte.

Die Staatsdienskommissie het intussen ‘n dringende beroep op onderhandelaars gedoen om gemeenskaplike gronde met vakbonde te kry. Die kommissie sê die voortslepende staking het ‘n negatiewe invloed op dienslewering, en die toekoms van veral matrikulante en siek mense word op die spel geplaas. Vakbonde behoort Maandag ‘n antwoord te gee op die staat se jongste salarisaanbod.

Short URL: http://www.koerant.co.za/?p=1468