Cele in spervuur oor miljarde rande se vermorsing

Die parlement het gister onthullings aangehoor dat top polisiebeamptes miljoene rand gemors het deur onwettige kontrakte aan te gaan om geboue en kantore op te knap.

Die polisiekommissaris, Bheki Cele het aan parlementslede gesê hy is sedert sy aanstelling in Julie 2009 gevra om verdagte transaksies te ondersteken. Dit hou ondermeer verband met aankope, die toekenning van boukontrakte en die aanstelling van konsultante.

Buiten miljoene rand wat bestee is aan die opgradering van kantore, wat die polisie gehuur het, is die polisie se forensiese bedrywighede ook uitgekontrakteer aan ‘n maatskappy wat behoort aan die eggenoot van ‘n polisiebeampte.

Waterkanonne ter waarde van 47 miljoen rand is ook aangekoop wat die polisie nie nodig gehad het nie. Cele het sy voormalige adjunk, Hamilton Hlela, en drie senior amptenare van Voorsieningsbestuur uitgewys. Hy sê Hlela het hom op verskeie geleenthede mislei met kontrakte wat hy wou hê Cele moet onderteken.

Short URL: http://www.koerant.co.za/?p=1462