Subscribe by Email

Korrupsie strem Europese herstel – Transparency International

Die verband tussen korrupsie en die voortslepende fiskale krisis in Griekeland, Italië, Spanje en Portugal kan nie langer geïgnoreer word nie, aldus ‘n verslag van Transparency International, wat pas bekend gestel is. Die verslag, Money, Politics, Power: Corruption Risk in Europe, lê die roede goed onder Suid-Europese lande in, maar die meeste van die 25 lande wat ondersoek is, spring ook nie heeltemal vry nie.

Die verslag is ook skerp oor die gebrekkige lobbie-beperkings wat in die meeste lande geld, wat tot die onbehoorlike beïnvloeding van politici en regerings lei. Boonop is daar gewoonlik nie deursigtigheid oor wie hoeveel geld aan politieke partye skenk nie.

Te veel lande handhaaf nie genoeg aanspreeklikheid met die toekenning van openbare kontrakte nie, wat in Europa jaarliks €1.8 biljoen (Engelse triljoen) beloop. Slegs twee lande het afdoende beskerming vir fluitjieblasers.

Denemarke, Swede en Noorweë is die beste deur wetgewing en ander maatreëls teen korrupsie verskans.

Onder die voorstelle om die situasie te verbeter tel die opknapping van beskikbaarheid van inligting aan die publiek, dat gedragskodes vir parlementslede ingestel word en dat wetgewing ingestel word, of opgeknap word, om fluitjieblasers beter te beskerm.

Hoe vergelyk Suid-Afrika met die lande wat genoem is? Suid-Afrika beklee die 64de posisie op die korrupsiepersepsie-indeks, Denemarke die tweede, Swede die vierde, en Noorweë die sesde. Spanje (31) is die probleemland wat die beste vaar, gevolg deur Portugal (32), Italië (69) en Griekeland (80).

Herman Toerien