Subscribe by Email

Internasionale waghondorganisasies ontstoke oor SA se Inligtingswetgewing

Beide Verslaggewers Sonder Grense (VSG) en Freedom House het skerp gereageer op die Nasionale Vergadering se goedkeuring van die omstrede wetsontwerp op die beskerming van staatsinligting.
Freedom House beskryf die wetgewing as drakonies, en VSG sê hy is geskok dat iets deurgevoer is wat persvryheid bedreig. VSG meen ook Suid-Afrika se status as rolmodel in die streek word bedreig.
Freedom House wys daarop dat Suid-Afrika selfs nog voor hierdie wetgewing reeds van persvrye land tot gedeeltelike persvrye land afgegradeer is. Boonop, wys die organisasie daarop dat dié wetgewing maar een van ‘n reeks stappe is om die wêreld vir mediavryheid moeilik te maak, soos die beoogde mediatribunaal.
VSG, wat tradisioneel Suid-Afrika baie goedgesind is, het die land verlede jaar reeds met vyf plekke op die persvryheidsindeks laat terugsak. Toe was die wetgewing nog bloot in die pyplyn, en die uitkoms daarvan onseker. Toe het VSG ook die beoogde mediatribunaal en Julius Malema se optrede teenoor ‘n BBC-joernalis as redes vir die kreeftegang genoem.
In 2006, toe die ANC ook sensuurwetgewing probeer deurvoer het, het VSG ook skerp gereageer en onder meer ‘n brief aan pres. Jacob Zuma gerig. Waar Suid-Afrika in 2003 nog die 21ste mees persvrye land in die wêreld en die mees persvrye in Afrika was, het dit in 2006 na 44ste plek teruggesak selfs al is die wetgewing nie deurgevoer nie.
Die land het hierna sy posisie weer geleidelik verbeter, tot dit verlede jaar met vyf plekke na die 38ste posisie teruggesak het. Verskeie Afrikalande, waaronder Namibië, Ghana en Mali vaar beter as Suid-Afrika op VSG se indeks.
Beide waghonde is bekommerd oor die impak wat die nuwe wetgewing op ondersoekende joernalistiek sal uitoefen, terwyl kommer ook oor die lot van fluitjiebalsers bestaan wat korrupsie aanmeld.