Subscribe by Email

Bulle Malema se Moses?

Jaco Skryf as volg:

Die volgende (onbeantwoorde) vraag deur n internetforum gebruiker het betrekking. “Kan iemand vir my sê hoekom die waarde van ons Rand so sterk bly te midde van al hierdie praatjies oor die nasionalisering van plaasgrond en die myne en die gesondheidstelsel? Hoekom is die waarde van ons aandelebeurs te midde van al hierdie rassepolarisasie nou so hoog dat \’n mens selfs gerugte van \’n borrel in die mark hoor? Hoekom het ons eiendomswaardes nie naastenby soveel geval as wat in die res van die wêreld gebeur het nie, ten spyte daarvan dat ons ekonomiese insinking en werksverliese in die resessie van die ergstes was, en ten spyte van die probleme by Eskom en die byna daaglikse stakings oor dienslewering? Ek probeer sin maak uit die gebeure in ons land, maar eerlikwaar, ek kan die kloutjie nie by die oor kry nie.”

Daar is natuurlik geen maklike antwoord op die vrae nie. Indien 10 verskillende ekonome om ‘n antwoord genader sou word, kan die vraesteller homself as ‘n spreekwoordelike verkleurmannetjie in ‘n smartieboks bevind, om te probeer sin maak uit die 10 uiteenlopende antwoorde wat hy sou ontvang.Ek gaan poog om die vrae op te deel en as ‘n leke-ekonoom daarop te antwoord.

Waarom bly die waarde van die Rand so sterk, ten spyte van die politieke situasie in die land?

Die Suid Afrikaanse Rand is, myns insiens, ‘n sentiment gedrewe geldeenheid. Verder glo ek dat alles in die lewe teen ‘n prys beskikbaar is, so ook sentiment. Die waarde van ons geldeenheid word voorts bepaal deur vraag en aanbod. Ons ondervind huidiglik ‘n geweldige vraag na die Rand, waarom? Watter faktore beinvloed sentiment positief ten spyte van die negatiewe politieke situasie soos deur die vraesteller uitgelig? Eerstens die rentekoersdifferensiaal tussen S.A. en die vernaamste eerstewêreldlande soos die VSA en Europa. Amerikaanse en Europese rentedraende beleggings betaal op die stadium feitlik geen rente nie. Die beleggers kan tot 6% (nominaal) meer op hul beleggings in Suid Afrika verdien. (Die effektiewe opbrengs vir die buitelandse belegger is egter baie hoёr. Ter illustrasie die volgende:

‘n Buitelandse fondsbestuurder besluit op 15 April 2009 om USD 1 000 000.00 op die S.A. geldmark te bele teen 6% rente p.j. Die $ word op die datum teen ‘n wisselkoers van 9.10 na ZAR omgeskakel – dus word ‘n bedrag van R 9 100 000.00 belê. Op 15 April 2010 is die beleggingswaarde in rand dus R 9 646 000.00 (R 9 100 000.00 plus 6% rente (R 546 000)). Die fondse word teruggeskakel na $ teen n wisselkoers van 7.20 ie. R9 646 000.00 / 7.20 = USD 1 339 722.22. n Effektiewe opbrengs van bykans 40% . Enige fondsbestuurder se droom en ‘n duidelike bewys dat die ZAR Bulle genoeg stoom het om enige Malema uitbarsting te weerstaan. (Die brute krag van die JSE Bulle sal in ‘n volgende artikel aangespreek word.

Tweedens is Suid Afrika tans op die hele wêreld se radar as gevolg van die komende Wêreldbeker Sokkertoernooi. Dit kan as rede dien waarom die Rand ander Opkomende Geldeenhede uitpresteer. Derdens het Kommoditeite soos bv. Goud, Platinum, Palladium ens. se pryse die laaste 6 maande geweldig toegeneem. Sommige reeds tot nuwe rekord vlakke. Dit lei tot n verdere invloei van buitelandse kapitaal wat ‘n positiewe invloed het op die waarde van die Rand.

Baie ander faktore wat die Rand positief beinvloed kan nog genoem word. Ek beskou bogenoemde egter as die kern redes vir die huidige sterk waardering van die Rand.