Subscribe by Email

ANC-jeugliga skarrel wild oor skikking – Afriforum

Malema en Winnie

Malema en Winnie

“Die ANC Jeugliga (ANCYL) is besig om rond te skarrel en na strooihalms te gryp, omdat dit (= die ANCYL) nou begin besef dat Julius Malema sy eie saak benadeel het deur in die hof vir die gehoor te speel, eerder as om billike argumente aan die hof voor te hou.” AfriForum het só gereageer op die feit dat Julius Malema teenoor die media aangedui het dat ʼn skikking buite die hof moontlik is, terwyl Floyd Shivambu die teenoorgestelde standpunt huldig in ʼn verklaring waarin hy AfriForum aanval en van leuens beskuldig.

Volgens Kallie Kriel, uitvoerende hoof van AfriForum, gaan sy organisasie volstoom met die hofsaak teen Malema voort en gaan AfriForum beslis nie afsien van die standpunt dat Malema se gebruik van die “Skiet die Boer”-slagspreuk haatspraak is nie. “AfriForum se regspan is gereed om Malema se erkennings tydens kruisondervraging, te gebruik om ʼn waterdigte saak aan die hof voor te hou tydens die lewering van slotargumente op 19 en 20 Mei 2011 in die Suid-Gautengse hooggeregshof,” het Kriel gesê. Malema het volgens Kriel tydens hofverrigtinge duidelik na vore getree as ʼn persoon wat met sy uitsprake gemeenskappe polariseer en disrespek teenoor ander mense toon. Kriel het daarop gewys dat Malema tydens kruisondervraging onder meer gesê dat “skiet die Boer” ook ʼn kontemporêre betekenis het omdat die struggle volgens hom nog nie verby is nie.

AfriForum sien volgens Kriel daarna uit dat die hofsaak sy gang gaan, sodat Malema deur die hof tot verantwoording geroep kan word. “Malema dink hy is verhewe bo die wet, maar die saak sal die teendeel bewys,” het Kriel bygevoeg.